34 సాయి చరణము

బాబా...

సుడిగుండాలంటి చిక్కుల వలయంలో
ఆకాశమంత ఎత్తయిన నమ్మకంతో
సంద్రమంత లోతైన ప్రేమతో
విశ్వమంత విశాలమైన భక్తితో
గది అంత ఇరుకైన మదిలో
నిలువెత్తు నీ రూప ధ్యానంతో

శూన్యమంటి నా ఒడిని నీ దయతో సంపూర్ణం చేయమంటూ
నీ పాదపద్మముల పై ఒక కన్నీటి బిందువునై నే వేడుకుంటున్నా...

ఓం శ్రీ సాయిరాం
🙏🙏🙏

-తేజ

33 సాయి పురము

బాబా..

ఏ జ్యోతిష్య పండితుడిని నేను ఆశ్రయించను
జాతకాలను తిరగరాసే సాయిబ్రహ్మ
నా చెంతనే ఉండెనుగా

ఏ జాతి రత్నాన్ని నేను ధరించను
నవరత్నాలను తలదన్నే అమూల్యమైన సాయిరత్నం
నా చెంతనే ఉండెనుగా

ఏ ఇతర యోగులను నేను ఆశ్రయించను
యోగి రాజైన సాయి సద్గురువు
నా చెంతనే ఉండెనుగా

సాయీ మరి
ఏ వ్యధలకు, వ్యాధులకు చోటివ్వకు నా గుండెలో
నువ్వే స్థిరముగా కొలువుండిన నా ఈ సాయిపురములో

ఓం శ్రీ సాయిరాం
🙏🙏🙏

-తేజ

32 సాయి ప్రేమ

బాబా...

నీ మాట ఎంత గొప్పది మా

ప్రతి బాటలో తోడుగా నిలుస్తున్నది

నీ కరుణ ఎంత గొప్పది

మమ్ము పదేపదే కాపాడుచున్నది

నీ ప్రేమ ఎంత గొప్పది

మమ్ము ప్రతీ క్షణం లాలిస్తున్నది

నీ క్షమ ఎంత గొప్పది

మమ్ము మనిషిగా తీర్చి దిద్దుతున్నది

నీ ఆశీస్సులు ఎంత గొప్పవి

నిరంతరం మాకు తోడుగా, నీడగా, రక్షగా నిలుస్తున్నవి

ఓం శ్రీ సాయిరాం
🙏🙏🙏

-తేజ

31 సాయి సర్వాంతర్యామి

బాబా...
షిరిడీ లోనే నువ్వున్నావు అంటే నేను నమ్మేదెలా?
మరి ఈ ప్రకృతిలో పచ్చదనంగా ఉన్న నిన్నేమనాలి?

ప్రకృతిలోనే నువ్వున్నావు అంటే నేను నమ్మేదెలా?
మరి ఈ పశుపక్షుల్లో జీవాత్మగా ఉన్న నిన్నేమనాలి?

పశుపక్షుల్లోనే నువ్వున్నావు అంటే నేను నమ్మేదెలా?
మరి కరుణ నిండిన కొందరి గుండెల్లో ఉన్న నిన్నేమనాలి?

కరుణపూరిత గుండెల్లోనే నువ్వున్నావు అంటే నేను నమ్మేదెలా?
మరి నా రాతి గుండెలో సైతం బంధీగా ఉన్న నిన్నేమనాలి?

నా గుండెలోనే నువ్వున్నావు అంటే నేను నమ్మేదెలా?
మరి అన్ని ఆత్మలలో అంతరాత్మగా కొలువై ఉన్న నిన్నేమనాలి?

ఆత్మలలోని అంతరాత్మగానే నువ్వున్నావు అంటే నేను నమ్మేదెలా?
మరి ఆపదలో పిలిచిన ప్రతిసారి పలికే నిన్ను పరమాత్మ అని అనకుండా ఇంకేమనాలి?

ఆత్మగా, అంతరాత్మగా, పరమాత్మగా కొలువైన నిన్ను సర్వాంతర్యామి అనక ఇంకేమనాలి?

ఓం శ్రీ సాయిరాం
🙏🙏🙏

-తేజ

30 సాయి శరణము

బాబా...

కన్నులతో చూసా నీ రూపము
సాయి మనసుతో చేసా నీ ధ్యానము

పెదవులతో పలికా నీ నామము
సాయి మనసుతో చేసా నీ స్మరణము

వీనులతో విన్నా నీ కథనము
సాయి మనసుతో చూసా నీ గాధను

సుమములతో చేసా నీ పూజను
సాయి మనసుతో చేసా నీ సేవను

కరములతో కొలిచా నీ చరణము
సాయి మనసుతో కోరా నీ శరణము

ఇలా పదములలో తెలిపా నా ప్రేమను
సాయి మనసుతో చేరా నీ పాదము

ఓం శ్రీ సాయిరాం 🙏🙏🙏

-తేజ

29 సాయి కరుణ

బాబా...

మా గుండెల్లో రగిలే వేదన చెప్తోంది మా

పాపముల భారమెంతో

నీ వాక్కుల అమృతము గ్రోలిన తరువాత తెలిసింది 

మా పూర్వపు పుణ్యమెంతో

మా అజ్ఞానపు చీకట్లు చూపుతున్నాయి 

మాా పూర్వపు దుస్థితి ఏమిటో

నీ పాదముల చెంత చేరిన మా ఈ స్థితి చూపుతోంది 

మా పూర్వపు భాగ్యమేమిటో

మా కష్టముల కడలి చెప్తోంది మేమెంత కాఠిన్యమో

నీ కారుణ్యపు నౌక చెపుతోంది నీవెంత కరుణమయుడివో

ఓం శ్రీ సాయిరాం 🙏🙏🙏

-తేజ

28 సాయి కల్పతరువు

బాబా...

చింతలను తీర్చే చింతామణులకే 

చింతామణివి నీవు

కోర్కెలను తీర్చే కామధేనువులకే 

కామధేనువువి నీవు 

తలచినది తీర్చే కల్పతరువులకే 

కల్పతరువువి నీవు

మా మది కోరకనే శ్రేయస్కరమైనది

మాకందించే శ్రేయోభిలాషివి నీవు

ఓం శ్రీ సాయిరాం 🙏🙏🙏

-తేజ

27 సాయి పలుకు

బాబా...

పిలిస్తే పలుకుతానన్నావు
తలిస్తే పక్కనే ఉంటానన్నావు
నీవైపు ఒక అడుగేస్తే, నావైపు పది అడుగులు వేస్తానన్నావు
నీ సమాధి నుండే నీవు మాట్లాడతానన్నావు

మరి నేను నిన్ను పిలిచేలా, తలిచేలా,
నీ వైపు నడిచేలా, నీతో మాట్లాడేలా
నా బుద్ధిని కూడా నీవే ప్రేరేపించు బాబా

ఓం శ్రీ సాయిరాం 🙏🙏🙏

-తేజ

26 సాయి శక్తి

బాబా...

అవ్యాజమైన నీ ప్రేమను 

ఎన్నిసార్లు రుచి చూసినా,

అపారమైన నీ కృపాధారలను 

ఎన్నిసార్లు చవిచూసినా, 

అద్భుతమైన నీ మహిమలను 

ఎన్నిసార్లు పొందినా,

అనిర్వచనీయమైన నీ ఉనికి ఘటనలను 

ఎన్నిసార్లు అనుభవించినా

తనివితీరక...

అనంతమైన నీ శక్తిధారలను మళ్లీ మళ్లీ

అభిలషించడమే మా నిరంతర ధ్యేయం

ఓం శ్రీ సాయిరాం 🙏🙏🙏

-తేజ

25 సాయి మహిమ

బాబా...

నీ చూపు, నీ రూపు, నీ తలపు
మము నడిపించేను నిత్యం

నీ కరుణ, నీ స్మరణ, నీ స్ఫురణ
మము రక్షించేను అనునిత్యం

నీ మమత, నీ చరిత, నీ మహిమ
మము దీవించేను ప్రతినిత్యం

నీ నామము, నీ అభయము, నీ చరణము,
మాకు చూపించేను మార్గం

ఇది జగమెరిగిన పరమ సత్యం

ఓం శ్రీ సాయిరాం 🙏🙏🙏

-తేజ