69 సాయి నీ పేరేమి?

సాయీ...

కరుణ నీ ఇంటి పేరా? 

ప్రేమ నీ మారుపేరా?

లేక ఓరిమి నీ ముద్దు పేరా?

లేకుంటే మాపై ఇంకనూ నీ దయకు కారణమేమి?

మా తప్పొప్పుల చిట్టాల చుట్టలు విప్పగా...

అన్నీ మా తప్పుల గుట్టలే

మాటిచ్చి మేమ తీర్చకుంటిమి, 

మరపుతో కొన్ని, మదముతో మరికొన్ని

నీ మాటల్ని మేము మీరమంటూనే తప్పుచుంటిమి

వాడుకలో కొన్ని, వగరుచు మరికొన్ని

మాటిమాటికి నీ శాసనాలు దాటుచుంటిమి

విషయ లోలత్వముతో కొన్ని, ప్రేమ లాలిత్యములో మరికొన్ని

విషయవాంఛలు ఓ చేయి పట్టి లాగుతుంటే

కర్మ బంధాలు మరో చేయి పట్టి లాగుతుంటే 

దిక్కు తోచక, దయ చూపమంటూ.. నీ ముందు మోకరిల్లుచుంటిమి

అయినా నీవు మాపై కరుణిస్తుంటివి

ఇప్పుడు చెప్పగలను ఖచ్చితంగా 

"క్షమే" నీ అసలు పేరని

మరి నన్నింత దగ్గరగా నీ గుండెల్లో పెట్టుకున్నావుగా

అందుకే నాకు బాగా తెలుసు 

ఓం శ్రీ సాయిరాం

🙏🙏🙏

-తేజ

68 సాయి మనఃపూజ

 

సాయీ....

తొలిపొద్దు సమయాన రెప్ప తీస్తూనే 

నీ రూపాన్నే చూడాలంటూ

నా కనులకి మెల్లిగా నేర్పిస్తా

నా మనసుని మెత్తగా శిక్షిస్తా

వేకువనే నీ రూపాన్ని చూస్తూనే 

నీ నామాన్ని పలకాలంటూ

నా పెదవులకు మెల్లిగా నేర్పిస్తా 

నా మనసుని మెత్తగా శిక్షిస్తా

ఘడియ ఘడియలో నిన్ను స్మరిస్తూనే 

సాటి జీవుల ఆకలి తీర్చమంటూ

నా కరములకు మెల్లిగా నేర్పిస్తా 

నా మనసుని మెత్తగా శిక్షిస్తా

తోటి వారికి సేవ చేస్తూనే 

నీ మందిరం వైపు అడుగేయమంటూ 

నా పదములకు మెల్లిగా నేర్పిస్తా 

నా మనసుని మెత్తగా శిక్షిస్తా

నిత్యం నిన్ను పూజిస్తూనే చంచలమైన 

నా మనసుని నీ సన్నిధిలో పెట్టమంటూ

నా బుద్ధికి మెల్లిగా నేర్పిస్తా 

నా మనసుని మెత్తగా శిక్షిస్తా

నిత్యం నీ లీలా పఠనం చేస్తూనే 

అరిషడ్వర్గాలను అదుపులో పెట్టమంటూ 

నా అహంకారానికి మెల్లిగా నేర్పిస్తా 

నా మనసుని మెత్తగా శిక్షిస్తా

నీ స్మరణతో విరిసిన ఒక్కో అక్షర సుమాన్ని 

ఇలా జత చేస్తూ నీ మెడలో వేయమంటూ

నా చేతులకి మెల్లిగా నేర్పిస్తా 

నా మనసుని మెత్తగా శిక్షిస్తా

శిక్షలన్నింటిని క్షమతో రద్దు చేయమంటూ 

నీ పాదాలను పట్టుకుని ప్రార్థిస్తా

మరి నా ఈ ఆత్మను నీకై నివేదిస్తా

ఓం శ్రీ సాయిరాం

🙏🙏🙏

-తేజ

67 సాయి అమృతం

 

కరడుగట్టిన హృదిని శిల్పంగా మలిచేందుకు సాయినామమన్న ఉలి దొరికెనుగా

అజ్ఞానపు చీకట్లను చీల్చి జ్ఞాన జ్యోతులను వెలిగించేందుకు సాయిరాముడన్న మణి దొరికెనుగా

బరువెక్కిన గుండెల బాధ తీర్చేందుకు            సాయిగానమన్న ఔషదము దొరికెనుగా

శ్రద్ధ, సబూరీల కలశలను నింపేందుకు              సాయిలీలలన్న అమృతము మెండుగ ఉండెనుగా

భయమేల? చింతేల? ముందుకు నడిచేందుకు                సాయి నామస్మరణతో ఈ జగమే వెలుగుతుండెనుగా

ఓం శ్రీ సాయిరాం

🙏🙏🙏

-తేజ

66 సాయి ఈ అలుకేల?

సాయీ....

విరివిగ అలరులు కురిపించు సాయీ 

మళ్ళీ ఈ అలుకేల మాపై?

మరువక మా కోర్కెలు మన్నించు సాయీ 

మళ్ళీ ఈ కినుకేల మాపై?

అడగకనే వరములు అందించే సాయీ 

ఈ అడుగుల ఎడమేల మాతో?

దయతో దరి చేర్చుకొనే సాయీ

ఈ దాగుడుమూతల ఆటేల మాతో?

క్షణమాగక కరమందించు సాయీ 

ఈ కోటి క్షణాల జాగేల మాకు?

చిరునవ్వుతో దర్శనమిచ్చు సాయీ

ఈ దోబూచుల శిక్షేల మాకు?

ఓం శ్రీ సాయిరాం

🙏🙏🙏

-తేజ

65 సాయి రావోయి

సాయీ....

రావయ్య సాయి మా ఇంటికి 

రావయ్య సాయి మా ఇంటికి 

రవ్వంతైన ఆలసించక రావయ్య సాయి మా ఇంటికి

రావయ్య సాయి మా ఇంటికి 

పిలిచినంతనే పలికెదనంటివి

ప్రేమతో పిలిస్తే వేగిరమే వచ్చెదనంటివి

మరి రావయ్య సాయి మా ఇంటికి 

రావయ్య సాయి మా ఇంటికి 

తలచినంతనే పక్కనే నిలిచెదనంటివి

ఇచ్చిన మాట ఎన్నడూ తప్పనంటివి

మరి రావయ్య సాయి మా ఇంటికి 

రావయ్య సాయి మా ఇంటికి

కొలిచినంతనే కష్టాలను తీర్చెదనంటివి

మా కన్నీటిని తుడిచెదనింటివి

మరి రావయ్య సాయి మా ఇంటికి 

రావయ్య సాయి మా ఇంటికి

నమ్మినంతనే వెన్నంటే నిలిచెదనంటివి

అమ్మవై ఆదుకుంటనంటివి

మరి రావయ్య సాయి మా ఇంటికి 

రావయ్య సాయి మా ఇంటికి 

రావయ్య సాయి మా ఇంటికి 

రావయ్య సాయి మా ఇంటికి 

రవ్వంతైన ఆలసించక రావయ్య సాయి మా ఇంటికి

రావయ్య సాయి మా ఇంటికి 

ఓం శ్రీ సాయిరాం

🙏🙏🙏

-తేజ

64 సాయి వచనాలు

 

బాబా...

అందరి దేవుడు ఒక్కడే అన్నావు

ప్రతి ఒక్కరి గుండెలో కొలువయ్యావు

శ్రద్ధ, సబూరి రెండే మార్గాలన్నావు

రెండు పైసల దక్షిణగా వాటిని కోరావు

మూడు రోజుల పాటు శ్వాసను నిలిపావు

ముక్కోటి దేవతల ప్రతిరూపమై నిలిచావు

నాలుగు చేతులతో నా బిడ్డల కాపాడెదనన్నావు

నాలుగు వేదాల సారాన్ని నీ చేతల్లో తెలిపావు

పంచ భూతాలను నీ అధీనంలో ఉంచావు

పంచేంద్రియాలను అదుపులో ఉంచమన్నావు

అరిషడ్వర్గాలను నీకే ఇమ్మన్నావు

షడ్రుచులను మించిన ప్రేమ రుచినే చూపావు

ఏడు రోజుల్లో నీ గ్రంథం చదవమన్నావు

ఏడేడు జన్మాల కర్మలు తొలగించెదనన్నావు

అష్టాంగ యోగాలను అవలీలగా చేశావు

అష్టకష్టాల నుండి మమ్మ రక్షించెదనన్నావు

నవవిధ భక్తికి ప్రతీకగా తొమ్మిది నాణాలిచ్ఛావు

నవ జీవన సరళికి నాంది పలికావు

పది మాటలకు ఒక్క మాట జవాబిమన్నావు

పది మందితో కలిసి మెలిసి ఉండాలన్నావు

పదకొండు నీ వచనాలందించావు

పరమ భక్తితో పాటించమన్నావు

సంఖ్యలలో తెలపలేనంత ప్రేమనే పంచావు

అసంఖ్యాకుల గుండెల్లో దైవమై నిలిచావు 

ఓం శ్రీ సాయిరాం 

🙏🙏🙏

-తేజ

63 సాయి గుణం

 

సాయీ...

కొందరిలా మనసుపెట్టి చేయలేను నీ పూజను  

మరికొందరిలా మైమరచీ చేయలేను నీ సేవను 

కొందరిలా భక్తితోటి చేయలేను నీ పూజను  

మరికొందరిలా ప్రేమతోటీ చేయలేను నీ సేవను 

కొందరిలా శ్రద్ధతోటి చేయలేను నీ పూజను 

మరికొందరిలా సబూరితోటీ చేయలేను నీ సేవను 

ధ్యానమే లేని పూజ నాది, 

ఓ యాంత్రిక పూజ నాది

లీనమే కాలేని పూజ నాది, 

ఓ తంతు పూజ నాది

ఐనా... చీదరించక, చీకాకు పడక ఆదరిస్తివి 

నన్నూ నీ బిడ్డనంటివి, నీ దరి చేర్చుకుంటివి

ఏంచేసి నేర్వగలను నీ గుణం

ఏమిచ్చినా తీర్చలేను నీ ఈ రుణం

ఓం శ్రీ సాయిరాం

🙏🙏🙏

-తేజ

62 సాయి పరమాత్మ

 సాయీ....

తీరూ తెన్నూలేక ఆత్మలందు ఘోషించే ఓ ఆత్మను తెస్తివి

దయతోటి ఈ దేహమిస్తివి, 

పేరిస్తివి, ఊరిస్తివి, ఉనికినిస్తివి

అంతటితో ఊరుకొంటివా, చల్లని నీ చేయిస్తివి

నీ పేరు తలిస్తే రక్షించెదనంటూ మాటిస్తివి

పిలిచిన వెంటనే పక్కనే నిలిస్తివి

చిగురుటాకులా వణికినప్పుడు చప్పున ఆదరిస్తివి

గుడిలో నీకు చేతులు జోడిస్తే నీ గుండెల్లో నాకు చోటిస్తివి

ఆశ వదులుకున్న ప్రతిసారి ఆత్మ విశ్వాసమై నిలిస్తివి

గుండె బరువెక్కిన ప్రతిసారి బతుకు తక్కెడలో మరోపక్క నిలిస్తివి

కన్నీటి చుక్కలను పన్నీటిగా మారిస్తివి

చుక్కల మధ్యలో చందురూని వోలే చక్కంగ నా గుండెలో నిలిస్తివి

ఇంత చేసిన నీకు నేనేమిస్తిని

పైనుండి ఈ నాలుగు అక్షరాల మాలిక తప్ప

లోనుండి నిరంతర నీ తలపుల మాలిక తప్ప

ఓం శ్రీ సాయిరాం

🙏🙏🙏

-తేజ

61 సాయి లేకుంటే

 

సాయీ........ 

నువ్వే కానీ లేకుంటే.....?

నువ్వే కానీ అవతరించకుంటే.......?

ఆ ఊహే నన్ను హరిస్తోంది

ఆ ధ్యాసే నన్ను దహిస్తోంది

చుక్కాని లేని నావల్లే

చుక్కలే లేని నభమల్లే  ఏమయ్యేను నా జీవితం

గమ్యం ఎరుగని పయనమల్లే 

గాలిలో పెట్టిన దీపమల్లే ఏమయ్యేను నా జీవనం

పొత్తిళ్ళలో దాచుకొనే తల్లే లేకుంటే

వేలు పట్టి నడిపించే తండ్రే లేకుంటే... ఏమయ్యేను నా జీవితం

అనుక్షణం ప్రేమను పంచే నీవే లేకుంటే...

క్షణక్షణం రక్షించే  నా బాబా లేకుంటే...ఏమయ్యేను నా జీవనం

నీవేకానీ లేకుంటే....?

నీవే కానీ మా కొరకు రాకుంటే...?

ఆ మాటకే కనులు కన్నీటి కొలనులౌతుంటే....

నువ్వు ఇప్పటికీ ఇంకా ఉన్నావన్న నీ ఉనికి ఒక్కటి చూస్తుంటే...

ఈ శ్వాస ఇంకా శ్వాసిస్తోంది

ఈ జీవి ఇంకా జీవిస్తోంది

నీ ప్రేమే నన్నిలా నడిపిస్తోంది

ఓం శ్రీ సాయిరాం

🙏🙏🙏

-తేజ

60 సాయి మహిమ

 

మంచి ముత్యాల ఆభరణం వన్నె కోల్పోయె

మేలిమి బంగారు ఆభరణం వెలవెలపోయె

నా సాయి ధరించిన క్షమ అన్న ఆభరణం ముందర

పట్టు వస్త్రముల విలువ చిన్నబోయె

పూల దండలన్నీ మూగబోయె

నా సాయి ధరించిన దయ అన్న వస్త్రం ముందర

అగరు ధూపాల సువాసనలు గాలిలో కలిసిపోయె

అత్తరు ఘుమఘుమలు కూడా చిన్నబోయె

నా సాయి వెదజల్లే తీయని ప్రేమ ముందర

నేను నేనన్న అహంకారము చిన్నబోయె 

నాదినీదన్న ద్వంద్వము ఏకమైపోయె

నా సాయి చూపించే చల్లని చూపు ముందర

జన్మ జన్మల కర్మ ఫలం ఊడిపోయె

జననమరణ చక్రం ఇరుసు విరిగిపోయె

నా సాయి కురిపించే అవ్యాజ కరుణ ముందర 

ఓం శ్రీ సాయిరాం 

🙏🙏🙏

-తేజ