101 సాయి నన్ను విడువకు

 

సాయి...

నేను పలకరించడం లేదని నువ్వు నాతో మాట్లాడటం మానేయకు సాయి...నా ప్రతి మాట మాటలో నీవే నిండి ఉండోయి 

నేను నిన్ను తలవడం లేదని నువ్వు నన్ను మరువకు సాయి... నా ప్రతి సెకను సెకనులో నీవే నిండి ఉండోయి 

నేను నీ చేయి విడిచానని నీవు నా చేయి విడిచేయకు సాయి....నా ప్రతి అడుగు అడుగులో నీవే నిండి ఉండోయి 

నేను నీ బాటలో అడుగు వేయట్లేదని నీవు నన్ను వదిలేయకు సాయి...నా ప్రతి బాట బాటలో నీవే నిండి ఉండోయి 

నేను ఏ జన్మలోనైనా నిన్ను మరుస్తానేమో....నీవు మాత్రం నన్ను మరువకు సాయి...నా ప్రతి జన్మ జన్మలో నీవే నిండి ఉండోయి

ఈ అక్షరాల సాక్షిగా.....ఇది నా విన్నపమోయి

ఓం శ్రీ సాయిరాం

🙏🙏🙏

-తేజ

100 సాయి పాద కమలము

 

సాయీ నే చేరితి నీ పాదకమలము....అది మధువులొలుకు దివ్యకమలము

సాయీ నే చేరితి నీ పాదకమలము...ఎన్నటికీ తీరనిది నా భ్రమర తృష్ణము

సాయీ నీ పాద కమలము చూసినంతనే కలుగు పుణ్యము...మరి తొలగు పాపము

సాయీ నీ పాద కమలము తాకినంతనే కలుగు అభయము...మరి తొలగు అధైర్యము

సాయీ నీ పాద కమలము పట్టినంతనే కలుగు హర్షము...మరి తొలగు భారము

సాయీ నీ పాద కమలము శిరమున నిలిపినంతనే కలుగు విశ్వాసము...మరి తొలగు ద్వైతము

సాయీ నీ పాద కమలము హృదిలో నిలిపినంతనే కలుగు విజయము...మరి తొలగు శోకము 

సాయీ నే చేరితి నీ పాదకమలము....అది మధువులొలుకు దివ్యకమలము

సాయీ నే చేరితి నీ పాదకమలము...ఎన్నటికీ తీరనిది నా భ్రమర తృష్ణము

ఓం శ్రీ సాయిరాం 🙏🙏🙏

- తేజ 

99 సాయి నామము

 

సాయి సాయి సాయి అనుచు సాయిని పిలువరే

సాయి సాయి సాయి అనుచు సాయిని తలువరే

సాయి సాయి సాయి అనుచు నిద్దుర లేవరే

సాయి దివ్య రూపాన్ని కనులారా చూడరే

సాయి సాయి సాయి అనుచు శ్వాసను పీల్చరే

సాయిని మది నిండా ‌‌‌‌నిలిపి నిత్యం కొలువరే 

సాయి సాయి సాయి అనుచు పూజను చేయరే

సాయికి మనసారా సేవలు చేయరే   |సాయి|

సాయి సాయి సాయి అనుచు నిత్యము పలుకరే

సాయిని ప్రతి జీవిలోన గాంచి తరియించరే  

సాయి సాయి సాయి అనుచు ఊది ధరియించరే

సాయి ఆశీసులను పొంది నిత్యం సుఖించరే

సాయి సాయి సాయి అనుచు చరితను చదవరే

సాయి అన్నివేళల్లోన మన వెంట నిలచునే  |సాయి|

సాయి సాయి సాయి అనుచు సత్సంగము చేయరే

సాయి లీలలని గాంచి తరియించరే

సాయి సాయి సాయి అనుచు ప్రేమను పంచరే

సాయి ప్రేమను మనసారా జుర్రుతు తాగరే  |సాయి|

సాయి నామమే ఔషధిగా మనసారా సేవించరే

సాయి నామమే మన భవ రోగాలను పారద్రోలునే

సాయి నామాన్ని భక్తిగ, భుక్తిగ గ్రహించరే

సాయి శక్తిని అణువణువున పొందరే

సాయి సాయి సాయి అనుచు సాయిని పిలువరే

సాయి సాయి సాయి అనుచు సాయిని తలువరే 

ఓం శ్రీ సాయిరాం

🙏🙏🙏

-తేజ

98 సాయి మందిరం

 

సాయీ.... 

చేరాలని ఉంది....చూడాలని ఉంది....

ఎవ్వరూ చూడలేని...మరెవ్వరూ చేరలేని ఓ సాయి మందిరమొకటి ఉందని తెలిసే

ఒక్క చోట ఉండదట...ఘడియకో తావు చేరునట

వేగంగా వెళ్ళునట....ఊరూరు తిరిగేనట

కనురెప్పలు మూస్తేనే ఈ వీక్షణం సాధ్యమట

మనసు తలుపులు తెరిస్తే తక్షణం లభ్యమట

శ్వాస మీద ధ్యాసతో...

శ్రద్ధా, సబూరీ ధ్యేయంతో

చీకటని చీకాకు పడక....

సవ్వడే లేదని డీలా పడక అలా మున్ముందుకు సాగగా సాగగా...

చివరాఖరికి,

చేరితిని చేరితిని ఓ దివ్య మందిరాన్ని

చూచితిని చూచితిని ఓ వెలుగు రేఖని

కలలోన కాదు, ఇలలోన కాదు

చీకటి కోనలోన ఓ దివ్వెవోలె

రాతిరిలోన చందురూనివోలె 

నా హృద్మందిరంలోన దైవంవోలె

మన సాయి తండ్రిని...మన ప్రేమైక మూర్తిని 🙏🙏🙏

ఓం శ్రీ సాయిరాం

🙏🙏🙏

-తేజ

97 సాయి దాగుడుమూతలు

 

సాయీ!

నాతో నీకీ దాగుడుమూతలేల?

రెప్పపాటు కాలంలో మాయమైన 

నీ కదలికలు నే చూడలేదునుకొంటివా?

నిన్నే తదేకంగా చూస్తున్న నా ఈ కన్నులకు తెలుసు ఓ రెప్పపాటు కదిలిన నీ నయనాల సంగతి... అది నాపై నీవు కురిపించే ప్రేమే అని

నిన్నే తనివితీరా చూస్తున్న నా ఈ కన్నులకు తెలుసు ఓ రెప్పపాటు కదిలిన నీ కరముల సంగతి... అది నాపై నీవు కురిపించే ఆశీర్వచనమే అని

నిన్నే ఆపాదమస్తకం చూస్తున్న నా ఈ కన్నులకు తెలుసు ఓ రెప్పపాటు కదిలిన నీ రూపం సంగతి... అది నాపై నీవు కురిపించే కరుణాల వర్షమే అని

"రెప్ప వేయకుండా నిన్నే గ్రోలుతున్న నా మనోనేత్రానికి తెలుసు నీతో నా బంధం అది ఎన్నో జన్మల పాటిదని"

ఓం శ్రీ సాయిరాం

🙏🙏🙏

-తేజ

96 సాయి శరణం

సాయీ...సాయీ...సాయీ.... దయచూపుమోయీ....సాయీ...

శరణంటూ చేరితి నీ దివ్య చరణాలను

కరుణంటూ వేడితి నీ భవ్య నయనాలను    సాయీ/

భిక్షంటూ వేడితి నీ కర కమలాలను

రక్షంటూ వేడితి నీ భుజ స్కంధాలను        సాయీ/

వినమంటూ వేడితి నీ ఇరు శ్రవణాలను

ప్రేమంటూ చూచితి నీ చిరు అధరాలను       సాయీ/

దీవెనంటూ కోరితి నీ స్మేర వదనానిని

సాయమంటూ వేడితి నీ ప్రియ హృదయానిని   సాయీ/

ఓం శ్రీ సాయిరాం

🙏🙏🙏

-తేజ

95 సాయి వైద్యం

సాయీ....

నీ నుండి నన్ను దూరం పెట్టే నా అహానికి చెప్పా... సాయికి నన్ను దగ్గర చేసే నా సాయిప్రేమ చాలా బలీయమైనదని

నీ నుండి నన్ను దూరం చేసే నా దుష్కర్మలకు చెప్పా... సాయికి నన్ను దగ్గర చేసే నా సాయికరుణ చాలా బలీయమైనదని

నీ నుండి నన్ను దూరం చేసే నా దురాలోచనలకి చెప్పా... సాయికి నన్ను దగ్గర చేసే నా సాయినామ స్మరణ చాలా బలీయమైనదని

నీ నుండి నన్ను దూరం చేసే నా చాంచల్యానికి చెప్పా... నా సాయికి నన్ను దగ్గర చేసే నా సాయిబంధం చాలా బలీయమైనదని

నీ నుండి నన్ను దూరం చేసే నా అజ్ఞానానికి చెప్పా... నా సాయికి నన్ను దగ్గర చేసే నా సాయిలీల చాలా బలీయమైనదని

నీ నుండి నన్ను దూరం చేసే నా అరిషడ్వర్గాలనే రోగాలకి చెప్పా... నా సాయికి నన్ను దగ్గర చేసే నా సాయివైద్యం చాలా బలీయమైనదని

ఓం శ్రీ సాయిరాం

🙏🙏🙏

-తేజ

Click here to see Saibaba puja with 108 types of flowers 

94 సాయి రథం

సాయి...

నిన్నే తలచిన ప్రతిసారి 

కదిలేను మా దేహరథం నీకు దగ్గరగా 

వెడలేను మా మనోరథం దుర్గుణములకు దూరంగా

నీ నామము పలికిన ప్రతిసారి

చేరనీ మమ్ము నీ తత్వ రథాలకు దగ్గరగా 

మరి ఈ లౌకిక  రథాలకు దూరంగా

నిన్నే కొలిచిన ప్రతిసారి 

వెడుతోంది నా ఆత్మ రథం ఓ మెట్టు ఉన్నతిగా

పడుతోంది ఈ దేహ రథం నీ ముందు ఓ దండముగా

నీ రూపాన్ని కనిన ప్రతిసారి

కదిలేను నా విశ్వాసమన్న అశ్వ రథం నీకు చేరువగా

ఓలలాడనీ సాయి రథంలో ఎన్నటికీ పదిలముగా

ఓం శ్రీ సాయిరాం

🙏🙏🙏

-తేజ

93 సాయి సమస్తం

 

సాయి అంటే తల్లి,తండ్రి,గురువు

సాయి అంటే దైవం,మార్గం,స్నేహం

సాయి అంటే క్షమ,ప్రేమ,కరుణ

సాయి అంటే విద్య,శ్రద్ధ,సబూరి

సాయి అంటే ఊది,ఊపిరి,విజ్ఞానం

సాయి అంటే వేదం,నాదం,గ్రంథం

సాయి అంటే సృష్టి,స్థితి,లయ

సాయి అంటే శక్తి,యుక్తి,ముక్తి

సాయి అంటే మంత్రం,తంత్రం,యంత్రం

సాయి అంటే చిత్రం,చమత్కారం,నిత్యాగ్నిహొత్రం

సాయి అంటే దీవెన,లాలన,పాలన

సాయి అంటే సత్యం,నిత్యం,ఆణిముత్యం

సాయి అంటే ధనం,దానం,ధాన్యం

సాయి అంటే బలం,బంధం,భవిష్యత్తు

సాయి అంటే జగం,జలం,జీవం

సాయి అంటే జాతకం,జీవితం,జాగృతం

సాయి అంటే మౌనం,ధ్యానం,త్యాగం

సాయి అంటే విశ్వం,విశ్వాసం,ఆధారం

సాయి అంటే జవాబు,ఔషధం,పరిష్కారం

సాయి అంటే యుగం,యాగం,యోగం 

సాయి అంటే ధైర్యం,మాధుర్యం,ఔదార్యం

సాయి అంటే కణం,కాలం,కవనం

సాయి అంటే శాంతి,కాంతి,క్షాంతి

సాయి అంటే అద్భుతం,ఆనందం,అనంతం

సాయి అంటే విధి,నిధి,పెన్నిధి

సాయి అంటే స్వరం,వరం,అదృష్టం

సాయి అంటే గానం,గమ్యం,గమనం

సాయి అంటే అభయం,అనుభవం,ఆశ్వాసన

సాయి అంటే అణువు,పరమాణువు,సర్వం

సాయి అంటే ఆత్మ, మనసు, శరీరం

సాయి అంటే నువ్వు, నేను, మనం

 

సాయీ ఇందు కానిదేది నువ్వు?

ఇవి కొన్ని అచ్చులహల్లుల అల్లిక కాదు

నా ఉచ్ఛ్వాస నిశ్వాసల మాలిక

నీ ఉనికి, నా విశ్వాసాల కలయిక....అంతా సాయిమయం

ఓం శ్రీ సాయిరాం

🙏🙏🙏

-తేజ

92 సాయి ‌సత్యం

సాయీ...

నీ రూపునే నే చూచితి

నిన్నే నిరతము వేడితి

నీ పేరునే నే పలికితి

నిన్నే మదిలో నమ్మితి

నీ వెంటే నే నడిచితి

నిన్నే నిత్యము కొలిచితి

నీ దయనే నే వేడితి 

నిన్నే ఆర్తితో పిలిచితి

నీ ప్రేమనే నే కోరితి

నిన్నే మరువక తలిచితి

నీ అభయమునే నే అడిగితి

నిన్నే సత్యంగ కొలిచితి

అరిషడ్వర్గాలకు నిలువెత్తు నామరూపం నేనైతే...

నామరూపాలకు అతీతమైన ఓ నిరంతర సత్యం నీవు

ఓం శ్రీ సాయిరాం

🙏🙏🙏

-తేజ

91 సాయినాథా!

షిరిడి పురవాస శ్రీ సాయినాథా.... 

జగమేలు మా తండ్రి సాయినాథా

బ్రతుకు చీకట్లను తొలగించు సాయినాథా.... 

వెలుగు రేఖల్ని నింపేవు సాయినాథా

ఈ వేళ ఆ వేళ ఏల సాయినాథా... 

అన్ని వేళలా మాతోటి ఉండు సాయినాథా      /షిరిడి పురవాస/

ఈ మాట ఆ మాట ఏల సాయినాథా... 

మా ప్రతి మాట నీ పాట కావాలి సాయినాథా    /షిరిడి పురవాస/

ఇచ్చోట అచ్చోట ఏల సాయినాథా... 

మా ఎద చోట కొలువుండు సాయినాథా    /షిరిడి పురవాస/

ఈ జన్మ ఆ జన్మ ఏల సాయినాధా... 

మా ప్రతి జన్మలోన వెంటుండు సాయినాథా... 

మము నడిపించు సాయినాథా...

షిరిడి పురవాస శ్రీ సాయినాథా.... 

జగమేలు మా తండ్రి సాయినాథా

బ్రతుకు చీకట్లను తొలగించు సాయినాథా.... 

వెలుగు రేఖల్ని నింపేవు సాయినాథా

షిరిడి పురవాస శ్రీ సాయినాథా.... 

జగమేలు మా తండ్రి సాయినాథా 

ఓం శ్రీ సాయిరాం

🙏🙏🙏

-తేజ

90 సాయి చేయి

 

పశుపక్షులని ప్రేమించే చేయి

ప్రియ భక్తుల్ని లాలించే చేయి

వ్యాధిని మాయం చేసే చేయి

వ్యధలను దూరం చేసే చేయి

ఊదినిచ్చి ఆదుకొనే చేయి

ఊతమయ్యి వెంట నిలిచే చేయి

తీపి ముద్దులను అందించే చేయి

ప్రేమ ముద్దలను కొసరి తినిపించే చేయి

కష్టాల ఊబి నుండి బైటికి లాగే చేయి

కన్నీటి చారల్ని సైతం తుడిచేసే చేయి

సర్వము నీవే అంటే గుండెలకు హత్తుకొనే చేయి

సర్వస్య శరణాగతి అంటే నిలువెల్ల దీవెనలు కురిపించే చేయి

ఓం శ్రీ సాయిరాం

🙏🙏🙏

-తేజ

89 సాయి నీవే నేను

సాయీ.....

నేనన్న ఈ జన్మకి కారణం నీవే 

నేనన్న ఈ అస్తిత్వానికి ఋజువు నీవే

నేనన్న ఈ ప్రశ్నకు జవాబు నీవే 

నేనన్న ఈ సమస్యకు పరిష్కారము నీవే 

నేనన్న ఈ వ్యాధికి ఔషధం నీవే

నేనన్న ఈ భారానికి బాధ్యత నీవే

నేనన్న ఈ కవనానికి ప్రేరణ నీవే

నేనన్న ఈ కథకి కల్పన నీవే

నేనన్న ఈ జీవితానికి అర్థం నీవే

నేనన్న ఈ మాటకు పరమార్థం నీవే

నేనన్న ఈ దేహానికి ఆత్మవు నీవే

నేనన్న ఈ ఆత్మలోని పరమాత్మవు నీవే

నీవు రచించిన ఓ చిన్ని రచనే నా ఈ జీవితం

నేనన్న నీ ఈ రచనకు ముగింపూ నీదే

నీవే రచించిన నేనన్న ఈ రచనకు దిగులేల? 

మరి ఇక తిరుగేల?

ఓం శ్రీ సాయిరాం

🙏🙏🙏

-తేజ

88 సాయి పల్లకి

 

చూడరండి చక్కని మా సాయి పల్లకి

అది గంధ పరిమళాల పూలపల్లకి

 

ఎక్కినారు మా సాయి పూలపల్లకి 

అది పూల పూత పూసిన భక్తి పల్లకి

ఎత్తరండి మా సాయి భక్తి పల్లకి

అది భక్తి రేణువులద్దిన ప్రేమ పల్లకి

తిప్పరండి మా సాయి ప్రేమ పల్లకి

అది ఈ హృది నుండి ఆ హృదిలోనికి

తిప్పరండి మా సాయి హృది పల్లకి

అది ఈ భువి నుండి ఆ దివి లోనికి

చూడరండి మా సాయి చిరునవ్వుల పల్లకి

అది నవ్వులద్దిన ఆనందాల పల్లకి

చూడరండి చక్కని మా సాయి పల్లకి

అది ప్రేమ వాసనలద్దిన పూల పల్లకి 

పెట్టరండి గోరుముద్దల్ని మా చిన్ని సాయికి

తీయరండి దిష్టిని మా చక్కని సాయికి

ఓం శ్రీ సాయిరాం

🙏🙏🙏

-తేజ

87 సాయి బాలసాయి

 

సాయీ...

తొలి సంధ్య వేళ బాల భానుని కాంతి నీది

మలి సంధ్య వేళ బాల చంద్రుని వెన్నెల నీది

తొలి పూజలందుకొనే బాల గణేశుని తత్వం నీది

అన్ని వేళలా కాపాడే బాలమురుగన్ మనసు నీది

పగటి వేళ  బాలరాముని తేజము నీది

రాత్రివేళ బాలకృష్ణుని అందము నీది

సర్వవేళలా బాల త్రిపురసుందరి శక్తి నీది

ఆర్తితో పిలిచిన వేళ బాల హనుమ రక్షణ నీది

సర్వకాల సర్వావస్థల యందు శరణాగతి చేసిన వారికి

సాయమందించే మా ముద్దుల బాలసాయివి నువ్వు

ఓం శ్రీ సాయిరాం

🙏🙏🙏

-తేజ

86 సాయి దివ్య పాదము

సాయీ... 

వెతలను తీర్చే మహిమాన్వితమైన

నీ దివ్య పాదాలను నన్ను అంటనివ్వు

ఎద మాటున దాగిన వ్యధలన్నింటినీ కధలుగా 

నీ పాదాలకు చెప్పుకోనివ్వు

ఆనకట్ట కట్టి ఆపిన కన్నీళ్లను బయటకు తీసి 

నీ పాదాలను కడగనివ్వు

మధురాతి మధురమైన నీ పదముల అమృతాన్ని

ప్రియమారా తాగనివ్వు 

పరమ పవిత్రమైన నీ పాద ధూళిలో 

నన్ను మైమరచి ఆటలాడనివ్వు 

జ్ఞాన గంధముతో విరాజిల్లు నీ పాద పుష్పముల

మకరందాన్ని నన్ను మనసారా  గ్రోలనివ్వు

ఓం శ్రీ సాయిరాం 

🙏🙏🙏

-తేజ

85 సాయి వందనం

 

సాయీ...

ఇక్కడ కాదు, అక్కడ కాదు ఎన్నెన్ని మందిరాల్లో 

నీవు కొలువై ఉన్నావో అన్నింటికీ నా వందనం

ఒకటి కాదు, రెండు కాదు ఎన్నెన్ని చిత్రపటాలలో 

నీవు కొలువై ఉన్నావో అన్నింటికీ నా వందనం

ఇందు కాదు, అందు కాదు ఎందెందు విగ్రహాలలో 

నీవు కొలువై ఉన్నావో అన్నింటికీ నా వందనం

ఒకటి కాదు, రెండు కాదు ఎన్నెన్ని ప్రాణుల్లో 

నీవు కొలువై ఉన్నావో అన్నింటికీ నా వందనం

వీరు కాదు, వారు కాదు ఎవరెవరి హృదయాలలో 

నీవు కొలువై ఉన్నావో వారందరికీ నా వందనం

నా ఆత్మలో కాదు, అంతరాత్మలో కాదు నా అణువణువునా

కొలువై ఉన్న నీకు నా ప్రేమ పూర్వక వందనం

ఓం శ్రీ సాయిరాం

🙏🙏🙏

-తేజ

84 సాయి హృది

 

సాయి బంధువులారా!

మన హృది పీఠం పై  సాయిని గురువుగ నిలపుదాం...

వారే మన జీవితానికి మార్గదర్శకమై నిలిచేను

మన హృది సింహాసనంపై సాయిని మహరాజుగ నిలపుదాం...

వారే మన ఇంద్రియాలను ఓడించేను

మన హృది భాండాగారంలో సాయిని అక్షయపాత్రగా నిలపుదాం...

వారే మనకి ఎన్నటికీ తరగని సంపదగా నిలిచేను

మన హృది మంజూషంలో సాయిని అమూల్య రత్నంగా నిలపుదాం...

వారే మన తరతరాలకు వారసత్వంగా నిలిచేను

మన హృది గదిలో సాయిని వైద్యునిగా నిలపుదాం...

వారే మన ఆది వ్యాధులకు చికిత్స చేసేను

మన హృది మందిరంలో సాయిని దైవంగా నిలపుదాం...

ఎనలేని ప్రేమను వారి నుండే వరంగా పొందుదాం

ఓం శ్రీ సాయిరాం

🙏🙏🙏

-తేజ

83 సాయి రేఖలు

వెలిగే భానుని ఉదయ రేఖల కాంతిలో నా సాయి అందం మెరిసే

వెలిగే దివ్వెల జ్యోతి రేఖల కాంతిలో నా సాయి అందం విరిసె

వెలిగే కర్పూర రేఖల కాంతిలో నా సాయి అందం వెల్లివిరిసే

వెలిగే సాయి రేఖల కాంతిలో నా మదిలో ప్రేమలు విరిసే

విరిసే నా ప్రేమ రేఖల కాంతిలో నా సాయి మరీమరీ మెరిసే....

ఆ మెరుపుల వెలుగులో నా డెందము మరింత మురిసిపోయే

ఓం శ్రీ సాయిరాం

🙏🙏🙏

-తేజ

 

82 సాయి హారము

 

రారండి రారండి సాయి భక్తులారా రారండి  

రారండి రారండి సాయి బిడ్డలారా రారండి

ఆణిముత్యమంటి మన సాయికి మేలిమి ముత్యాల హారమె‌ వేద్దాము

జాతిరత్నమంటి మన సాయికి నవరత్నాల హారమె వేద్దాము

రారండి॥

చంద్రుడంటి చల్లనైన సాయికి చంద్ర హారమె వేద్దాము

కరుణ కాసుల్ని కురిపించే సాయికి కాసుల‌ హారమె వేద్దాము

రారండి॥

వెన్న వంటి మనసున్న సాయికి వెండిపూల హారమె వేద్దాము

వర్ణభేదమెరుగని మన సాయికి సువర్ణ హారమె వేద్దాము

రారండి॥

వెన్నెల వెలుగులు చిమ్మే మన సాయికి వెన్నెల హారమె వేద్దాము

పూల మారాజైన మన సాయికి పూల హారమె వేద్దాము

రారండి॥

ప్రేమ మూర్తైన మన సాయికి ప్రేమలహారమె వేద్దాము

మనసెరిగిన మన సాయికి మన మనసుల హారమె వేద్దాము

రారండి రారండి సాయి భక్తులారా రారండి  

రారండి రారండి సాయి బిడ్డలారా రారండి

ఓం శ్రీ సాయిరాం 

🙏🙏🙏

-తేజ